У жніўні 2020 года беларусы выйшлі на вуліцы ў знак пратэсту супраць вынікаў сфальсіфікаваных прэзідэнцкіх выбараў. Гэтыя пратэсты хутка сталі найбуйнейшымі ў гісторыі краіны і ў выніку былі жорстка падаўленыя. Дзясяткі тысяч чалавек былі арыштаваныя, збітыя і прыцягнутыя да адказнасці. Маштабныя кампаніі па дэзынфармацыі працягваюць суправаджаць жорсткасць рэжыму Аляксандра Лукашэнкі ў адносінах да ўласных грамадзян, незалежных СМІ і грамадзянскай супольнасці.
Беларускія дзяржаўныя СМІ з’яўляюцца саўдзельнікамі жорсткага падаўлення іншадумства ў краіне. Прымусовыя, паказаныя па тэлебачанні «прызнанні» палітвязняў – толькі адзін са шматлікіх прыкладаў, якія ілюструюць, што кантраляваныя дзяржавай СМІ сталі працягам дзяржаўнага рэпрэсіўнага апарату ў Беларусі. Таксама мы назіралі, як беларускія дзяржаўныя СМІ дапамагалі беларускім чыноўнікам выкарыстоўваць міграцыю ў ЕС у якасці зброі. Больш за тое, рэжым Лукашэнкі і яго медыяапарат сыгралі важную ролю ў падтрымцы поўнамаштабнага ўварвання Расіі ва Ўкраіну.
Беларускія ўлады ўжываюць рэпрэсіі і ў дачыненні да сацыяльных сетак. Напрыклад, многія папулярныя незалежныя Telegram-каналы былі прызнаныя «экстрэмісцкімі матэрыяламі».
Тым часам пракрамлёўскія СМІ працягваюць падтрымліваць дэзынфармацыйныя кампаніі ў Беларусі і вакол яе. Яны ілжыва абвінавачваюць Захад у арганізацыі «каляровай рэвалюцыі», сцвярджаючы, што дэмакратычная беларуская апазіцыя з’яўляецца «марыянеткай Захаду», і навешваючы на прыхільнікаў дэмакратыі цэтлік «змагароў», экстрэмістаў, тэрарыстаў і паслядоўнікаў нацызму.
Аператыўная працоўная група па стратэгічных камунікацыях уважліва сочыць за сітуацыяй з СМІ і дэзынфармацыяй у Беларусі. Ніжэй прадстаўлена наша падборка артыкулаў аб дэзынфармацыі і маніпуляванні інфармацыяй, якія накіраваны супраць дэмакратычнай Беларусі і ажыццяўляюцца як Лукашэнкам, так і пуцінскай экасістэмай маніпулявання інфармацыяй.
База даных EUvsDisinfo складаецца з паведамленняў у міжнароднай інфармацыйнай прасторы, якія даюць няпоўнае, скажонае або ілжывае ўяўленне аб рэчаіснасці і распаўсюджваюць ключавыя пракрамлёўскія ідэі. Аднак гэта не абавязкова азначае, што адпаведнае выданне звязана з Крамлём ці ягоная рэдакцыя з'яўляецца пракрамлёўскай або што яно наўмысна імкнулася дэзінфармаваць сваю публіку. Публікацыі EUvsDisinfo не адлюстроўваюць афіцыйную пазіцыю ЕС, паколькі інфармацыя і выказаныя меркаванні заснаваныя на паведамленнях СМІ і аналізе аператыўнай групы East Stratcom.
